Manuscript msA, page 19v

Manuscript msA, page 19v

prev: 19r

next: 20r

Iliad text

1.377 αἰδεῖσθαί θ’ ἱ̈ερῆα καὶ ἀγλαὰ δέχθαι ἄποινα·

1.378 ἀλλ’ οὐκ Ἀτρείδῃ Ἀγαμέμνονι ἥνδανε θυμῷ·

1.379 ἀλλὰ κακῶς ἀφίει· κρατερὸν δ’ ἐπὶ μῦθον ἔτελλε·

1.380 χωόμενος δ’ ὁ γέρων πάλιν ᾤχετο· τοῖο δ’ Ἀπόλλων

1.381 εὐξαμένου ἤκουσεν . ἐπεὶ μάλα οἱ φίλος ἦεν·1

1.382 ἧκε δ’ ἐπ’ Ἀργείοισι κακὸν βέλος· οἱ δέ νυ λαοὶ1

1.383 θνῇσκον ἐπασσύτεροι· τὰ δ’ ἐπῴχετο κῆλα θεοῖο1, 2

1.384 πάντῃ ἀνὰ στρατὸν εὐρὺν Ἀχαιῶν · ἄμμι δὲ μάντις

1.385 εὖ εἰδὼς ἀγόρευε θεοπροπίας ἑκάτοιο·

1.386 αὐτίκ’ ἐγὼ πρῶτος κελόμην θεὸν ἱ̈λάσκεσθαι·

1.387 Ἀτρείωνα δ' ἔπειτα χόλος λάβεν· αἶψα δ’ ἀναστὰς

1.388 ἠπείλησεν μῦθον· ὃ , δὴ , τετελεσμένος ἐστίν·1

1.389 τὴν μὲν γὰρ συν νηῒ θοῇ ἑλίκωπες Ἀχαιοὶ

1.390 ἐς Χρύσην πέμπουσιν· ἄγουσι δὲ δῶρα ἄνακτι·

1.391 τὴν δὲ νέον κλισίηθεν ἔβαν κήρυκες ἄγοντες

1.392 κούρην Βρισῆος τήν μοι δόσαν υἷες Ἀχαιῶν ·1, 2

1.393 ἀλλὰ σὺ εἰ δύνασαί γε . περίσχεο παιδὸς ἑῆος·1, 2, 3

1.394 ἐλθοῦς’ οὔλυμπον δὲ , Δία λίσαι· εἴ ποτε δή τι1

1.395 ἢ ἔπει ὤνησας κραδίην Διὸς , ἠὲ καὶ ἔργῳ .

1.396 πολλάκι γάρ σεο , πατρὸς ἐνὶ μεγάροισιν ἄκουσα1, 2, 3

1.397 εὐχομένης , ὅτ’ ἔφησθα κελαινεφέϊ Κρονίωνι 1, 2, 3

1.398 οἴη ἐν ἀθανάτοισιν ἀεικέα λοιγὸν ἀμῦναι·1

1.399 ὁππότε μιν ξυνδῆσαι Ὀλύμπιοι ἤθελον ἄλλοι·1, 2, 3, 4

1.400 Ἥρη τ’ ἠδὲ Ποσειδάων καὶ Παλλὰς Ἀθήνη ·1

1.401 ἀλλὰ σὺ τόν γ’ ἐλθοῦσα θεὰ ὑπελύσαο δεσμῶν .1, 2

Scholia text

msA, 1.1031, commenting on 1.381 ‡εὐξαμένου ήκουσεν Σέλευκος φησὶν ἐν τῇ Κυπρίᾳ καὶ Κρητικῇ ἐπεί ρά νύ οἱ φίλος ῆεν · καὶ Θεαγένης δὲ οὕτως προφέρεται ἀπίθανον γὰρ τὸ ο δέ νυ λίαν φίλος ἦν ⁑

msA, 1.1032, commenting on 1.383 ἐπασσύτεροι Αἰολικόν ἐστι . ἄσσον ἀσσότερος ἀσσύτερος , ὡς ὄνομα ὄνυμα καὶ ἐπασσύτερος

msA, 1.1033, commenting on 1.388 ἠπείλησεν μῦθον ἀμφίβολος ἡ στιγμῆ δια τὸ μόριον ἐπεὶ καὶ αὐτὸ ἀμφιβολον· ὅμως δὲ εἰς τὸ ὅς ὑποτακτικὸν αρθ αὐτὸ μεταληπτέον ⁑

msA, 1.1034, commenting on 1.392 κούρην Βρισῆος ἐοικεν πατρωνυμικῶς τὰ ὀνόματα αὐτῶν σχηματίζειν ὁ ποιητὴς καὶ οὐ κυρίως ὡς γὰρ ἄλλοι ἀρχαῖοι ἱ¨στοροῦσιν . ἡ μὲν Ἀστυνόμη ἐκαλεῖτο· ἡ δὲ Ἱπποδάμεια ὁ δὲ τρόπος ἀντωνομασία ⁑

msA, 1.1035, commenting on 1.393 ἀλλὰ σὺ εἰ δνασαί γε ὅτι Ζηνόδοτος γράφει εοῖο ⁑

msA, 1.1036, commenting on 1.396 πολλάκι γάρ σεο Ἀρίσταρχος εγκλιτικὴν παρέλαβε τὴν ἀντωνυμίαν λέγων τὸ δηλούμενον εἶναι τοιοῦτο πολλάκις γάρ σοι ἐν τοῖς τοῦ πρς μου δόμοις ἤκουσα καυχωμένης . ἐαν γάρ φησι κατ ορθὸν τόνον ἀναγνῶμεν ἔσται εν τοῖς τοῦ νιρέως οίκοις ὁ Αχιλλεὺς αὐτῆς ἀκηκοώς· ταύτην δὲ τὴν ἱστορίαν οὐκ οῖδεν Ὅμηρος , τοσαῦτα ὁ Ἀρίσταρχος καὶ οἱ ἀπ αὐτοῦ· Πτολεμαῖος δὲ συγκατατίθεται μὲν τῇ ἐγκλιτικῇ ἀναγνώσει , οὐ μὴν τῇ προκειμένη αἰτίᾳ . εἴ γε ἤδη καὶ αὐτὸς ὁ Ἀρίσταρχος τὸ τοιοῦτο φησὶ παρεφύλασσεν ὡς ὅτι ταῖς μὲν πρωτοτύποις οὔτως χρῆται κατα γενικήν ἐμέο ἐμεῖο ἐμεῦ ἐμέθεν · ὁμοίως καὶ ὁ ἐπι δευτέρου καὶ τρίτου , ταῖς δὲ κτητικαῖς ἤτοι ἐμοῦ ἢ εμοῖο σοῦ σοῖο · ἐγίνετο οὖν εἴπερ ἦν κτητικῆ σοῖο ὥστε κὰν ορθοτονήσωμεν τὴν σέο , οὐ δύναται ἀμφίβολος καθίστασθαι· ἡ γὰρ γραφὴ διελέγχει ὅτι πρωτότυπός ἐστιν ἐγένετο οὖν ἐγκλιτικῇ ἡ ἀνάγνωσις ἐπειδήπερ ἁπλῆ εστιν καὶ οὐκ έχει ἀντιδιαστολὴν καὶ ἐπεκράτησεν ἡ ἀνάγνωσις ⁑

msA, 1.1037, commenting on 1.396 ἡ διπλῆ δὲ ὅτι ἀπο τούτου τοῦ στιχου ἕως τοῦ τὸν καὶ καὶ ὑπέδδεισαν Ζηνόδοτος αθετεῖ βραχὺ δὲ διασταλτέον μετα τὴν αντωνυμίαν τὸ γὰρ ἑξῆς ἐστι πολλάκι γάρ σου ἤκουσα ⁑

msA, 1.1038, commenting on 1.397-1.401 εὐχομενης διασταλτέον μετὰ τὸ ευχομένης καὶ αμῦναι , ἐπὶ δὲ τὸ Ἀθήνη στιγμήν . ἐνδέχεται δὲ καὶ οὕτως ἐπὶ μὲν τὸ λοιγὸν ἀμῦναι στίζειν τὰ δ’ ἄλλα ἀπ άλλης προφέρεσθαι ἀρχῆς ἕως τοῦ Ἀθήνη ⁑

msA, 1.1039, commenting on 1.397 κελαινεφέϊ παρα τὸ μελαίνοντα τὸν ἀέρα νειφην αὐτόν·

msA, 1.1041, commenting on 1.399 ὁππότε μιν ξυνδῆσαι Ζεὺς παραλαβὼν τὴν ἐν οὐνῳ διοίκησιν περισσῶς τῇ παρρησίᾳ ἐχρῆτο πολλὰ αὐθάδη διαπρασσόμενος Ποσειδῶν δὲ καὶ Ἥρα καὶ Ἀπόλλων καὶ Ἀθηνᾶ ἐβούλοντο αὐτὸν δήσαντες ὑποτάξαι· Θέτις δὲ ἀκούσασα παρα τοῦ πρς Νιρέως ἢν γὰρ μάντις τὴν Διὸς επιβουλὴν ἔσπευσεν πρὸς αυτὸν ἐπαγομένη Αἰγαίωνα φοβητρον τῶν ἐπιβουλευόντων θεῶν ἦν δὲ θαλασσιος δαίμων οὗτος καὶ τὸν πρα Ποσειδῶνα κατεβράβευεν . ἀκούσας δὲ ὁ Ζεὺς Θετιδος , τὴν μὲν Ἥραν ἐν τοῖς κατ αυτοῦ δεσμοῖς ἐκρέμασε , Ποσειδῶνι δὲ καὶ Ἀπόλλωνι τὴν παρα Λαομέδοντι θητείαν ἐψηφίσατο· τῇ δὲ Θέτιδι τὴν Ἀχιλλέως τιμὴν εἰς τὰ μετα ταῦτα ἐταμιεύσατο· ἱστορεῖ Δίδυμος ⁑

msAil, 1.1043, commenting on 1.382 ἔπεμψεν

msAil, 1.1044, commenting on 1.383 ἐπάλληλοι πυκνοι :

msAil, 1.1045, commenting on 1.392 αντωνομασία :

msAil, 1.1046, commenting on 1.393 φρόντισον

msAil, 1.1047, commenting on 1.394 λιτάνευσον

msAil, 1.1048, commenting on 1.396 ἐν τοῖς οίκοις

msAil, 1.1049, commenting on 1.397 οτε ἔλεγες

msAil, 1.1050, commenting on 1.397 τοῦ ομβροποιοῦ

msAil, 1.1051, commenting on 1.398 αποστρέψαι

msAil, 1.1053, commenting on 1.399 συν

msAil, 1.1054, commenting on 1.399 οἱ Τιτᾶνες

msAil, 1.1055, commenting on 1.401 εξείλω ἔλυσας

msAil, 1.1056, commenting on 1.401 συναπτέον τοῦτον τὸ ἑξῆς βραχὺ δὲ διασταλτεον ἐπι το Όλυμ ⁑

msAim, 1.1042, commenting on 1.393 +ὑποστικτεον ἐπι τὸ γε στικτεον δὲ κατα το τέλος τοῦ στίχου ⁑