Manuscript msA, page 245r

Manuscript msA, page 245r

prev: 244v

next: 245v

Iliad text

18.303 πρωῒ δ’ ὑπηοῖοι σὺν τεύχεσι θωρηχθέντες .

18.304 νηυσὶν ἔπι γλαφυρῇσιν ἐγείρομεν ὀξὺν Ἄρηα ·

18.305 εἰ δ’ ἐτεὸν παρα ναῦφιν ἀνέστη δῖος Ἀχιλλεὺς ·

18.306 ἄλγιον αἴ κ’ ἐθέλῃσι . τῷ ἔσσεται . οὔ μιν ἔγωγε

18.307 φεύξομαι ἐκ πολέμοιο δυσηχέος . ἀλλὰ μάλ’ ἄντην

18.308 στήσομαι· ἤ κε φέρῃσι μέγα κράτος . ἦ κε φεροίμην·1, 2

18.309 ξυνὸς Ἐνυα̋λιος · καί τε κτανέοντα κατέκτα·1

18.310 ὥς Ἕκτωρ ἀγόρευ’ . ἐπὶ δὲ Τρῶες κελάδησαν·1

18.311 νήπιοι . ἐκ γάρ σφεων φρένας εἵλετο Παλλὰς Ἀθήνη .

18.312 Ἕκτορι μὲν γὰρ ἐπῄνησαν . κακὰ μητιόωντι·1

18.313 Πουλυδάμαντι δ’ ἂρ , οὔ τις . ὃς ἐσθλὴν φράζετο βουλήν·

18.314 δόρπον ἔπειθ’ εἵλοντο κατὰ στρατόν· αὐτὰρ Ἀχαιοὶ

18.315 παννύχιοι Πάτροκλον ἀνεστενάχοντο γοῶντες·

18.316 τοῖσι δὲ Πηλείδης αδινοῦ ἐξῆρχε γόοιο·1

18.317 χεῖρας ἒπ’ ἀνδροφόνους θέμενος στήθεσσιν ἑταίρου·1, 2

18.318 πυκνὰ μάλα στενάχων . ὥς τε λὶς ἠϋγένειος·1

18.319 ᾧ ῥά θ’ ὑπὸ σκύμνους ἐλαφηβόλος ἁρπάσῃ ἀνὴρ1, 2

18.320 ὕλης ἐκ πυκινῆς . ὃ δέ τ’ ἄχνυται ὕστερος ἐλθὼν·

18.321 πολλὰ δέ τ’ ἄγκε’ ἐπῆλθε μὲτ’ ἀνέρος ΐχνι’ ἐρευνῶν1

18.322 εἴ ποθεν ἐξεύροι . μάλα γὰρ δριμὺς χόλος αἱρεῖ .

18.323 ὣς ὃ βαρὺ στενάχων μετεφώνεε Μυρμιδόνεσσιν·1

18.324 ῶ πόποι . ῆ ρ’ ἅλιον ἔπος ἔκβαλον ἤματι κείνῳ1

18.325 θαρσύνων ἥρωα Μενοίτιον ἐν μεγάροισι·1

18.326 φῆν δέ οἱ εἰς Ὀπόεντα . περικλυτὸν υἱὸν ἀπάξειν

18.327 Ἴ̈λιον ἐκπέρσαντα· λαχόντά τε ληΐδος αῖσαν·

Scholia text

msA, 18.110, commenting on 18.308 στήσομαι , ἦ κε φέρῃσι· προς τὸ παράδοξον ἀντέθηκε· ἀπίστου γὰρ ὄντος τοῦ ἀντιστῆναι Ἀχιλλεῖ τὸν Ἕκτορα προσθεὶς τὸ τῆς ἀδηλίας , παρεμυθήσατο τὴν ἀπιστίαν ⁑

msA, 18.111, commenting on 18.309 ξυνὸς Ἐνυάλιος ⁚ κοινὸς ὁ πόλεμος πολλάκις τὸν κτείνειν βουλόμενον κατέκτα· ὅμοιον δὲ τῷ ἐπιμὶξ δέ τε μαίνεται Ἄρης ⁑

msA, 18.112, commenting on 18.310 ἐπι δε Τρῶες κελάδησαν , πολλὰ ἦν τὰ συναναγκάζοντα πείθεσθαι τοὺς Τρῶας , πρῶτον μὲν ἡ ἄνοια ἡ βαρβαρικῇ . δεύτερον δὲ τὰ χρήματα ἃ προέτεινεν αὐτοῖς· τρίτον ὅτι τὴν μὲν ἀπόλαυσιν ἐκείνοις ἐχαρίσατο τὸν δὲ κίνδυνον αὐτὸς ἐπανεῖλεν παννύχιοι Πάτροκλον · ὅρα τὰς μεταβάσεις ὡς πυκίλαι · ποτε μὲν ἐν τοῖς ἔργοις ὁτὲ δὲ ἐν τοῖς λόγοις ἀγωνιζομένου τοῦ ποιητοῦ· νῦν δὲ καὶ ἐφ ενι εἴδει τῷ θρήνῳ ⁑

msA, 18.113, commenting on 18.317 χείρας ἐπ ανδροφόνους , ἀμφίβολον πότερον τὰς αὐτοῦ ἀνδροφόνους χεῖρας ὁ Αχιλλεὺς επιθεὶς τῷ τοῦ ἑταίρου στήθει ἢ τας τοῦ ἀνδροφόνου Πατρόκλου ἐπιθεὶς τῷ ἰδίῳ στήθει· βέλτιον δὲ τὸ πρότρον ⁑

msA, 18.114, commenting on 18.318 πυκνὰ μάλα στενάχων ὥς τε λις ἠϋγένειος⁚ ἐμπείρως πάνυ αἱ γὰρ θήλειαι κάλλιστον ἔχουσι γένειον οἱ δὲ ἄρσενες χαίτην· νῦν δ’ ἐπι θηλείας ἄρσην γὰρ οὐ σκυμναγωγεῖ τὸ δε λέαινα νεώτερον ὄνομα ⁑

msA, 18.115, commenting on 18.319 ᾧ ῥα θ’ ὑπο σκύμνους· σκύμνος ὡς ὕμνος εἰς ἰδιότητα ἀνεγνώσθη· τὸ μέντοι ἀνδρονυμικὸν ὀξύνεσθαι ἀξιοῖ ὁ Ἀσκαλωνίτης προς διαφοράν· ὁ μέντοι λόγος συναγωνίζεται τῇ βαρείᾳ τάσει τα γὰρ εἰς νος λήγοντα μετ ἐπιπλοκῆς συμφώνου δισύλλαβα μονογενῆ ἔχοντα ἐν τῇ προ τέλους συλλαβῆ τὸ υ βαρύνεσθαι θέλει· ὕμνος κύκνος · λύχνος Κύθνος · οὕτως ἄρα καὶ σκύμνος · ἡ διπλῆ δὲ ὅτι ουτ τοὺς κυνηγοὺς καταχρηστικῶς λέγουσιν οἱ ποιηταί ⁑

msA, 18.116, commenting on 18.324 ὦ πόποι ῆ ῥ άλιον . ἐκτείνει τὸ πάθος . ὁ τοιοῦτος λόγος οὐ γὰρ ἐφ οῖς αὐτὸς ἠπατήθη λυπεῖσθαί φησὶν ἀλλ’ εφ οῖς αὐτὸς ἠπάτησε τὸν Μενοίτιον ⁑

msA, 18.117, commenting on 18.325 θαρσύνων ἥρωα Μενοίτιον , καὶ τοῦτο περιπαθῶς ὡς τοῦ Μενοιτίου οὐκ αντι δώσοντος τὸν παῖδα δια τὴν προς τὸν υἱὸν φιλοστοργίαν εἰ μὴ Αχιλλεῖ κατεπίστευσεν ὡς σῶσαι ἱκανῷ ὄντι καὶ επαγγειλαμένῳ τοῦτο ⁑

msAil, 18.12, commenting on 18.312@ἐπῄνησαν συγκατεθεντοι

msAil, 18.13, commenting on 18.319@ἐλαφηβόλος κοινηγὸς

msAim, 18.36, commenting on 18.323 γράφεται μετεφώνεε ⁑

msAint, 18.28, commenting on 18.308 στικτέον ἐπι τὸ στήσομαι ⁑

msAint, 18.29, commenting on 18.316 γοεροῦ θρηνώδους ⁑

msAint, 18.30, commenting on 18.317 δια τοῦ σ ἅπασαι ἀνδροφόνους ⁑

msAint, 18.31, commenting on 18.321 φάραγγας σπήλαια