Manuscript msA, page 41r

Manuscript msA, page 41r

prev: 40v

next: 41v

Iliad text

2.843 υἷε δύω Λήθοιο Πελᾱσγοῦ Τευταμίδᾱο :

2.844 αὐτὰρ Θρήϊκας ἦγ’ Ἀκάμας καὶ Πείροος ἥρως

2.845 ὅσσους Ἑλλήσποντος ἀγάρροος ἐντὸς ἐέργει :

2.846 Εὔφημος δ’ ἀρχὸς Κικόνων ἦν αἰχμητάων

2.847 υἱὸς Τροιζήνοιο διοτρεφέος . Κεάδᾱο :1

2.848 αὐτὰρ Πυραίχμης ἄγε Παίονας ἀγκυλοτόξους

2.849 τηλόθεν ἐξ Αμυδῶνος ἀπ’ Ἀξίου εὐρὺ ῥέοντος

2.850 Ἀξίου : οὗ κάλλιστον ὕδωρ ἐπικίδναται αἶαν :

2.851 Παφλαγόνων δ’ ἡγεῖτο Πυλαιμένεος λάσιον κῆρ1

2.852 ἐξ Ενετῶν , ὅθεν ἡμιόνων γένος ἀγροτεράων1, 2

2.853 οἵ ῥα Κύτωρον ἔχον , καὶ Σήσαμον ἀμφενέμοντο :

2.854 ἀμφί τε Παρθένιον ποταμὸν κλυτὰ δώματ’ έναιον :1

2.855 Κρῶμνάν τ’ Αἰγιαλόν τε καὶ ὑψηλοὺς Ἐρυθίνους :

2.856 αὐτὰρ Ἀλιζώνων Ὀδίος καὶ Ἐπίστροφος ἦρχον1, 2

2.857 τηλόθεν ἐξ Ἀλύβης , ὅθεν ἀργύρου ἐστὶ γενέθλη .

2.858 Μυσῶν δὲ Χρόμις ἦρχε καὶ Ἔννομος οἰωνιστής :1

2.859 ἀλλ’ οὐκ οἰωνοῖσιν ἐρύσσατο κῆρα μέλαιναν

2.860 ἀλλ’ ἐδάμη ὑπὸ χερσὶ ποδώκεος Αἰακίδᾱο

2.861 ἐν ποταμῷ ὅθι περ Τρώας κεράϊζε καὶ ἄλλους :

2.862 Φόρκῡς αὖ , Φρύγας ἦγε καὶ Ἀσκάνιος θεοειδής :1

2.863 τῆλ’ ἐξ Ἀσκανίης . μέμασαν δ’ ὑσμῖνι μάχεσθαι :

2.864 μῄοσιν αῦ , Μέσθλης τε καὶ Ἄντιφος ἡγησάσθην

2.865 υἷε Ταλαιμένεος , τὼ γυγαίῃ τέκε λίμνη1

Scholia text

msA, 2.791, commenting on 2.847 υἱὸς Τροιζήνοιο · οὕτως Τροιζήνοιο ὡς Εὐμήλοιο ἀπο γὰρ γενικῆς τῆς Τροίζηνος ἐγένετο εὐθεία ἔθει ποιητικῷ ⁑

msA, 2.792, commenting on 2.851 Παφλαγόνων δ’ ἡγεῖτο· ὅτι οῦτος ἐστι Πυλαιμένης περι οῦ πολλοὶ τῶν ἀρχαίων ἐζητήκασιν ⁑

msA, 2.794, commenting on 2.854 ἀμφί τε Παρθένιον ποταμὸν : τοῦτον ἕνιοι λέγουσιν δια τὴν πραότητα οὕτως προσαγορεύεσθαι : ἢ ἐπειδὴ παρθένος οῦσα ἐν αυτῷ ἐλούσατο ⁑

msA, 2.795, commenting on 2.856 αὐτὰρ ἀλιζώνων Ὀδίος ὅτι καὶ ἕτερος ἐστιν Ὁδίος ὁμώνυμος καὶ παρα τοῖς Ἕλλησιν Ἐπίστροφος ⁑

msA, 2.796, commenting on 2.856 Ἀλιζῶνες δὲ ἔθνος Πόντου εἰσι δὲ οῦτοι βοιωτοὶ οὕς τινας Οἴνοπας φασὶ οἱ δὲ ἔθνος Αἰακῶν ⁑

msA, 2.797, commenting on 2.858 Μυσῶν δὲ Χρόμις ὅτι νῦν μὲν Χρόμιν ἐν ἄλλοις δὲ λέγει Χρόμιον τὸν αὐτον ⁑

msA, 2.798, commenting on 2.860-2.861 ἀλλ’ εδάμη ὑπο χερσὶ : ἀθετοῦνται ἀμφότεροι ὅτι κατα τὴν περιποταμίαν μάχην οὐχ εὑρίσκεται επ’ ονόματι πίπτων εἴωθεν δὲ ὁ ποιητὴς τοὺς τῶν ηγεμόνων θανάτους διαδήλως λέγειν ἐὰν δὲ μὴ ὁρισθῇ ὁ τόπος καὶ ὁ καιρὸς δύναται ὁ ετερος μένειν ⁑

msA, 2.799, commenting on 2.862 ‡τῆλ’ εξ Ασκανίης : ὅτι οἱ νεώτεροι τὴν Τροίαν καὶ τὴν Φρυγίαν τὴν αὐτὴν λέγουσιν ὁ δε Ὅμηρος οὐχ οὕτως : Αἰσχύ δὲ συνέσχεεν . οὗτοι δὲ τῆς μικρᾶς εἰσι Φρυγίας : ἡ δὲ μεγάλη παρα τῷ Σαγγαρίῳ κεῖται ὅθεν καὶ Ἄσιος ὃς μήτρως ἢν Ἕκτορος ἱπποδάμοιο ⁑

msA, 2.800, commenting on 2.865 τῷ Γυγαίη τέκε λίμνη· ἄνευ τοῦ ϊ Γυγαίη τέκε λίμνη ἡ κατα Ἀρίσταρχον εἶχε διόρθωσις : οἱ δὲ περὶ Χαῖρον καὶ Διόδωρον καί τισι τῶν καθ ημᾶς προστιθέασι τὸ ϊ ἵν’ λίμνῃ ἐπι Γυγαίῃ τέκε κακῶς μηδέποτε γὰρ Ὅμηρον λημνῶν τέκνα ἱστορεῖν . βίαιοι δέ εἰσι ⁑

msAint, 2.801, commenting on 2.852 ὅτι Ζηνοδοτος γράφει ἐξ Ενέτης ⁑